عارفين الست اللي بتربي ولادها لوحدها دي بتواجه إيه ؟! و بتتحمل حاجات كتير بتعدي عليها إزاي ؟!

فيه حاجات ممكن تحس بيها لما تسمع تحدياتها .. و هتتعاطف .. بس لما تجربها بنفسك .. لما تستوعب قطمة الضهر .. لما تدوق المسؤولية اللي بتسجن الروح .. ربنا بيلطف اكيد .. بس حقيقي محدش ابدا هيقدر يفهم يعني ايه ست بتربي ولاد لوحدها .. مفيش كلام ممكن يوصف حاجة زي دي !!

عشان كده .. لما تلاقى ست بتربي لوحدها .. لو مبتعرفش تحس بيها .. على الأقل ابعد لسانك و حكمك عنها !! هى مش ناقصاك .. لان عوضها بس من عند ربنا .. لان الشيلة تقيلة بصورة محدش عمره ممكن يتخيلها ..

لو حواليك .. ست بتربي لوحدها .. خفف عنها بكلمة حلوة .. بتشجيع .. بتخفيف مسؤولياتها لو ده فى استطاعتك ..

الدنيا طريقها تقيل و طويل .. و ان الست تمشيها بولادها لوحدها جبل حقيقي و هى شايلاه .. وانا متأكدة ان ربنا طالما كتب عليها بكده .. فده عشان هى مميزة بشكل رهيب و أد الشيلة .. عندها قوة داخلية تخليها تستمر .. و تفضل صامدة و قوية ..

و اقول لكل واحدة عايشة الحياة دي متفقديش ابدا الامل .. كل ما تتعبي اعرفي ان ده من حقك .. اقفلي عينك في اى موضع كنتي فيه .. مهما كان فيه صريخ وطلبات .. اقفلي عينك .. و فكري قد ايه انت قوية .. قد ايه انت بطلة .. و متفتحيش عينك و لا تكملي الا لو شحنتي نفسك كفاية .. متستنيش شحن ابدا من برة و لا من حد .. انتى قوية بنفسك صدقيني .. اللي تعيش شايلة عيالها لوحدها .. تقدر تقوي نفسها و تكمل .. آمني بنفسك .. هتديكى قوة و مرونة و صلابة !

.

اجمدي .. انتى قدها

انتي قوية