كيف يستفيد المحامي المتدرب من مرحلة التدريب ؟!

كيف يستفيد المحامي المتدرب من مرحلة التدريب ؟!

اهم سؤال لازم كل زميل مع بداية رحلته المهنية يسئله لنفسه

وباختصار شديد ,,

الاستفادة المطلوب تحقيقها مش هتخرج عن ثلاث محاور 🎯

اولا : بناء الشخصية

شخصية المحامي اول بناء لازم نركز عليه .. شخصيته في كل تفصيلة تخصه .. طريقة كلامه .. مظهره .. اسلوبه في التواصل بشكل عام .. ثقافته الشخصية .. تفاصيل كتيير اوي مرتبطة بشخصية المحامي لازم تكون مختارة بعناية .

اوعي تكون انسان مش عارف انت عايز ايه ولا عارفة انت رايح فين .. شخصيتك لازم تكون شغوفة جدا وطموح لابعد الحدود .. متخليش لك سقف يوقفك .. كل المحامين اللي شايفهم ناجحين دلوقتي .. من البداية عرفوا قوانين بناء الشخصية السليمة وده مش هيحصل في يوم وليله .

نصيحة مني اتعلم ومارس واسعي في بناء شخصية قوية مهما كلفك الامر

ثانيا : شبكة العلاقات

لو سالت اي محامي هيقولك ان المحاماه ما هي الا علاقات .. بالعلاقات تاخد شغل خاص .. بالعلاقات تخلص شغلك وانت مرتاح .. بالعلاقات تعرف اي معلومة وده مهم جدا في شغلنا .

علي سبيل المثال :

واحد له اصدقاء كتيير مع بداية شغله في المحاماه بدأ يعرفهم انه محامي مع الوقت وهتبقي تفتكر الكلام ده هيجيلو شغل منهم ومن عائلاتهم .. وهتبص علي الزملاء الاعزاء في المحاكم اللي بقالهم فترة عارفين الموظفين باسمائهم واسماء القضاه بدوائرهم .. شوية شوية والعلاقات تزيد هتلاقي نفسك عارف فلان في السجلات تساله علي حاجة .. واحد من الضرائب يساعدك في تخليص حاجة وهكذا .

مينفعش تخرج من مرحلة التدريب وانت معكش علي الاقل 400 رقم .. 100 زملاء .. 100 موظفين .. 100 خدمات .. 100 موكلين .

خلي عندك تارجت عايز تحققه من مرحلة التدريب واسعي بكل قوة تحققه .

ثالثا : الخبرة العملية

الخبرة العملية بتختلف من شخص لاخر .. ومفهومها له تفاصيل كتيير .. في مجالنا الامر له طبيعة خاصة شوية .. بس اجملها وده نصيحة زملاء افاضل كبار انك تمشي باستراتيجية “القطعة”

علي سبيل المثال :

لو شغل المحاماه في قضايا الاسرة 30 دعوي مختلفة لكل دعوي صيغة مختلفة وطلبات مختلفة واجراءات مختلفة .. انت مش محتاج اكثر من انك تمسك دعوي دعوي وتذاكرها صح ويا حبذا لو في المكتب اللي نازل فيه تشتغلها كاملة هتستفاد اوي وهتلاقي نفسك متقنها ومع الوقت نقدر نقول ان المحامي الفلاني بيعرف يشتغل شغل اسرة كويس وشاطر .. وكل فترة تمسك دعوي جديدة لحد ما تلاقي نفسك قدرت تشتغل اغلب الدعاوي الخاصة بالاسرة وعارف تفاصيلها .

لو فكرت بالمنطق ده في بداية رحلتك في العمل كمحامي ثق انك مش هتخرج من مرحلة التدريب وانت متقن ومؤهل بشكل كبير لان يكون عندك مكتبك الخاص باذن الله

انسي الفلوس في الاول وبكرة هتجيلك لحد عندك

ومتخليهاش عائق تخليك متركزش تحقق اكبر نجاح ممكن في الثلاث محاور دول 🙂

وربنا يوفقنا جميعا ..