نصائح لتجنب اخطاء قانونية شائعة.
نصائح لتجنب اخطاء قانونية شائعة.
١- لا توقع على سند امانة تحت أي ظرف من الظروف ولأي سبب كان وحتى لو كان المبلغ مقدور عليه وفيك تدفعو.
٢- سند الامانة او عقد البيع سواء اشتريتو من المكتبة مطبوع كليشة جاهزة وعبيت الفراغات او كتبتو باشراف محامي مطبوع عالكومبيوتر بصيغة المحامي الخاصة واللي بشوفا مناسبة او كتبتو بخط الايد الو نفس الحجية ونفس القوة لانو بيستمد قوتو من التوقيع عليه مو من شكلو.
٣- سندات الامانة سواء عليها تاريخ او ما عليها تاريخ الها نفس القوة ونفس المفعول لا تخلي حدا يسلبا عليك ويقلك اذا عليها تاريخ ما الها قيمة او العكس.
٤- اذا بدك تحط مبلغ عند حدا واخدت شيك كضمانة لحقك لا تحط عليه تاريخ لانو بعد مدة ببطل الو مفعول يا غالي.. ولا تنسى تاخد القلم اللي كتب الشيك فيه وتخبيه معو مشان وقت بدك تحط التاريخ ما تفوت مع البنك بمشاكل تغيير القلم ولون الحبر.
٥- قبل ما تعطي مصاري لحدا ليشغلك ياهن تأكد انو في املاك باسمو لتحصل حقك فيون اذا اضطريت لانو اسهل شي عالنصاب يكتبلك ورق يثبت حقك ويهرب من الشرطة واستنى سنين لينكمش بقا.
٦- اذا بدك تشتري بيت او سيارة او أي شي قيمتو كبيرة والو سجلات ملكية
خلي هاد الشراء يكون باشراف محامي بتوثق فيه حصراً لانو ممكن تخسر المصاري والشي اللي اشتريتو
٧- اذا الك حق عند حدا لا تنام عليه لانو بعد مدة معينة ببطل من حقك تطالب فيه.
٨- اذا كنت مشتري وجابولك العقد وقريت فيه عبارة “ساقط الخيار” او “علماً انه ساقط الخيار” او اي شي مشابه اوعك توقع عليه مهما كنت بتوثق باللي عم يبيعك
٩- اذا بدك تشتري اي شي الو سجلات ملكية
تأكد انك كشفت عليه بايدك وعرفت مواصفاتو بدقة وحفظتا سواء بيت او سيارة او شاليه او غيرو… ولا تسأل ليش لانو هي من الافكار السرية شوي بالمهنة.. اذا احتجت هالنصيحة بتتذكرا.
١٠- العقد بحد ذاتو ما بيضمنلك حقك
لا تعمل عقد بدون ما تنفذو فوراً او تاني يوم بكير.. اوكي بينجاب حقك بس رح تتعذب وبصير بدو شغل بدقة كبيرة
#منقول من صفحة الاستاذ حكم حسن
دمتم بخير ❤❤
