⚖️ آداب الاتصال بالمحامين ⚖️
⚖️ آداب الاتصال بالمحامين ⚖️
دي اداب ولو ان نص موكلينا فاقدين الآداب وحراميه اتعاب😂😂
1- لما تتصل بالمحامي و ما يردش عليك بلاش 20 مكالمة ورا بعضهم لانه ممكن يكون فى جلسة قدام القاضي او بيحضر تحقيق في النيابة ماهو مش معقولة يعنى هيقول للقاضى او وكيل النيابة لحظة ويرد على تليفونك ويكمل مرافعة او التحقيق بتاعه.
2- لما تتصل بالمحامي وما يردش عليك بلاش 20 مكالمة ورا بعضهم لانه ممكن يكون نايم لانه بينام زى باقي البشر عادى يعنى.
3- لما تتصل بالمحامي و مايردش عليك بلاش 20 مكالمة ورا بعضهم لانه ممكن يكون في الحمام .. لانه احيانا بيدخل الحمام زي الناس.
4- بلاش تتصل الساعة خمسة الصبح و تقوله انا كلمتك كذا مرة و انت ما رديتش لانك ببساطة ممكن تسمع رد يخليك تدور على قطع غيار لكرامتك شهر ومش هتلاقيها .
5- بلاش تتصل الساعة 3 الصبح و تقول انا اخويا محبوس وعايز اخرجه ..ايوة يعنى ان شاء الله فى نيابة وابقي كلمنى ٩ الصبح ماهو انا مش رئيس مباحث العاصمة عشان اروح اقطع المحضر واجيبهولك من القسم واديه لسيادتك.
6-الخميس و الجمعة اجازة ومفيش شغل بالمحاماة غير فى حالات الطوارئ فياريت بلاش ازعاج لان ده الوقت الوحيد اللى المحامى بيقضيه مع العيلة أو أصحابه فياريت متبقاش رخم .
7- ما بينفعش تكلم المحامي الساعة 7 الصبح علشان تساله جلستي انهارده ولا لأ .
8-, لما تتصل اول مره على المحامي بلاش تقلول له انا اللي جيت مع فلان فى المكتب لانه بيمر عليه ناس كتير ويمكن اصلا مش فاكر الشخص الا انت بتقول عليه ده .
9- بلاش تكلم المحامي الساعه 8 الصبح تقول له .. بفكرك يا استاذ أن الجلسه انهارده .. لانه ببساطه .. انت مالك اهلك ؟؟؟؟
10- بلاش تتصل بالمحامي تقوله دخلت على google و قرأت القانون الفلانى ولقيته بيقول …كذا وكذا لانه ببساطة لو المحاماة موجودة على النت كان زمان كليات الحقوق قفلت و بطلت تخرج محامين .. و كان زمان كل واحد بيتابع قضيته بنفسه.
11- بلاش تستغل المحامي استشارات وهو في السياره وهو في السوق وهو في الجامع لان الاستشاره بتكون فى المكتب وبمقابل مادى لان هو ماتعبش سنين ومازال بيتعب في الاطلاع والدراسه عشان سيادتك تاخد علمه ببلاش
12-بلاش تتصل على المحامي بعد الجلسه وانت حاضر في القاعه وتسأله ايه اللي حصل في الجلسه او التأجيل امتى وانت كنت موجود بحجة انك ما فهمتش لانه باختصار طالما ما بتفهمش خليك في بيتك احسن وابقي كلم المحامى فى المكتب وهيبلغك باللى تم .
13-بلاش كل يوم تيجي على المكتب تسأل ايه اخبار القضية لانه غالبا الجلسه كل شهر أو أكثر مش كل يوم.
14-اتعاب المحامي حق ليه لان مفيش محامي بيشتغل هواية فاعطي المحامي حقه.
15- قضيتك محجوزة للنطق بالحكم فياريت بلاش تتصل بالمحامى قبل الحكم بيوم وتقوله تفتكر القاضي هيحكم بكرة بأيه لان حضرتك بتكلم محامى مش عراف بيشوف الطالع وكمان بلاش تكلمه يوم الحكم بالليل وتقولى الحكم ايه لان الاحكام بنعرفها تانى يوم مش فى نفس اليوم
واخيرا لو مفهمتش اى حاجة من الوصايا ال 15 الى فاتوا يبقي بلاش تتصل على محامى احسنلك 😂
*منقول .
