اهم النصائح لطلاب كليات الحقوق والمحامين المبتدئين
اهم النصائح لطلاب كليات الحقوق والمحامين المبتدئين
1- اوعي تكون بتدرس حقوق و تخرج تشتغل أي حاجة غير المحاماة هتبقي ضيعت أهم فرصة في حياتك.
2- المحاماة مهنة الفن و المتعة و الرقي و
الإبداع.
3- لو لسه متخرج و جايلك شغل ب 10.000 جنيه في الشهر ارفض و انزل اتدرب في مكتب محاماة ب 300 جنيه في الشهر و في الآخر هتكسب.
4 – لو انت مش ( باشا في نفسك ) يبقي مينفعش تبقي محامي.
5 – لو انت كسول او مش عايز تشغل دماغك او مبتحبش الشغل الكتير يبقي متكملش البوست و روح اشتغل كاشير في سوبر ماركت بسمة أمل.
6 – الشغل في النيابة العامة و الإدارية و مجلس الدولة و هيئة قضايا الدولة حاجة جميلة و مرتبات كويسة بس المحاماة اعظم و فلوسها آكتر .
7 – انت و وزير العدل متخرجين من نفس الكلية.
8 – فريد الديب اغني من وزير العدل .
9 – مرتب النائب العام في سنة كاملة ممكن المحامي يكسبه في قضية واحدة.
10 – المحامي بيقبل الملفات الي علي مزاجه و يرفض الباقي لكن النائب العام ميقدرش يعمل كده
11- متتجوزش غير لما يبقي ليك اسم و بتعرف تجيب فلوس.
12- الخبرة مش بالسن و جيل الشباب دايماً اشطر من الجيل الي قبله ( العب علي النقطة دي هتكسب ).
13- الي يقولك لازم تصبر خمس سنين من غير فلوس علشان تتعلم دا عايز يستغلك او بيفتي.
14- اشتغل ليل و نهار لحد ما توصل للي انت عايزه او لحد ما تموت ايهما اقرب ( هتوصل متخفش).
15- لما ربنا يكرمك بقضية كبيرة جرب تقول قبل الرول بتاعك ( رَبِّ اشْرَحْ لِي صَدْرِي وَيَسِّرْ لِي أَمْرِي وَاحلُلْ عُقْدَةً مِّن لِّسَانِي يَفْقَهُوا قَوْلِي) هتعمل مرافعة محصلتش في التاريخ.
16- لو قابلت أستاذ من اساتذتك خصم في قضية احترمه كامل الإحترام و بعدها علم عليه بشطارتك.
17 – إمتى تعرف انك بقيت افضل محامي ؟ لما تخرج من قاعة المحكمة وانت باصص بتناكة و كل الناس بتبصلك بإنبهار و تبتسم.
18- لو حد ( غلبان ) قصدك في مشكلة متاخدش منه فلوس.
19- متضيعش دم حد و متضيعش مال يتيم.
20- هتخسر كتير لو مشتغلتش محامي
